Ideja që u hodh nga Presheva.com është për t’u përshëndetur sepse me këtë organizim dëshmojmë se Presheva është bashkautore e jetës kulturore në hapsirën mbarëshqiptare. Pas Panairit të librit në Tiranë, Prishtinë, Tetovë, Ulqin, etj., edhe kryeqendra e Luginës do të bëhet nikoqire e panairit të librit. Autorët shqiptarë, botuesit, përkthyesit, mediat do të vijnë në Preshevë ku më parë për ta ka qenë e pamundur.

E përshëndes idenë që erdhi nga ideatorët që jetojnë dhe veprojnë në Luginë. Mbi ju bie barra në realizimin e projekteve kulturore. Duhet të formohet një grup punues që do të mirret kryekëput me këtë çështje. Duhet të gjinden njerëzit, jo vetëm që e duan librin por edhe demonstrojnë njohuri profesionale.

Nga përvoja ime që përfitova gjatë organizimit të edicionit të parë Panairi i Librit Nju Jork 2009, ju inkurajoj që të bëni tentativat për të organizuar këtë projekt shumë të nevojshëm për popullsinë tonë. Fillimi është i vështirë, por i realizueshëm. Si Shoqatë e Shkrimtarëve Shqiptaro-Amerikanë që veprojmë në Amerikë, do të kontribojmë duke sjellë libra të anëtarëve të Shoqatës. Librat do t’ju dhurohen grupit punues, për t’í përdorur në fondin e panairit.

Libri le të na bashkojë. Në vendin tonë kemi një armatë lexuesish, që e meritojnë një dialog me librin. Me këtë aktivitet kulturor do të fillojë një kapitull i ri në jetën kulturore në Luginë.



Adnan Mehmeti

Presidenti i Shoqatës së Shkrimtarëve Shqiptaro-Amerikanë

Nju Jork, 28 janar 2010

(presheva.com)